धनकुटा ,४ जेठ । धनकुटामा टाटा विंगर दुर्घटना हुँदा एक महिलाको मृत्यु भएको छ।
धनकुटाको चौबिसे गाउँपालिका–४ विजिटारस्थित निर्माणाधीन तमोर करिडोर सडकखण्डमा सोमबार बिहान करिब ९ः३० बजे इटहरीबाट पाँचथरतर्फ जाँदै गरेको प्रदेश १–०१–००१ ज ३९४९ नम्बरको टाटा विंगर आफैँ अनियन्त्रित भई पल्टिएको प्रहरीले जनाएको छ।
दुर्घटनामा मोरङको सुन्दरहरैंचा नगरपालिका–६ बस्ने ४० वर्षीया सवित्रा ढुंगेलको मृत्यु भएको छ। उनी गाडीभित्र च्यापिएकी अवस्थामा रहेकी थिइन्। उद्धारका क्रममा उनलाई मृत अवस्थामा फेला पारिएको जिल्ला प्रहरी कार्यालय धनकुटाका सुचना अधिकारी प्रहरी नायव उपरीक्षक ज्ञान कुमार महतोले जानकारी दिए ।
दुर्घटनामा गाडी चालक पाँचथरको फाल्गुनन्द गाउँपालिका–१ बस्ने अन्दाजी २८ वर्षीय तेजकुमार चेम्जोङ र ताप्लेजुङको फुङ्लिङ नगरपालिका–८ बस्ने २२ वर्षीय दिपेन रसाइली घाइते भएका छन्। उनीहरूको शरीरका विभिन्न भागमा चोट लागेको छ।
घाइते दुवैजनालाई उपचारका लागि तत्काल उद्धार गरी धरानस्थित बिपी कोइराला स्वास्थ्य विज्ञान प्रतिष्ठान पठाइएको प्रहरीले जनाएको छ।
