लन्डन । गैर आवासीय नेपाली संघ बेलायतले आउंदो २३ मार्चमा हुने एकता महाधिवेशनबारे जानकारी दिन एक पत्रकार सम्मेलन गर्ने भएको छ ।
संघले निर्वाचन समिति, आयोजक समिति र विधान संशोधन कमिटीसंग आउंदो २ मार्च मध्यान्ह १२.३० मा ठमेल रेष्टुरेन्ट अल्डरसटमा पत्रकार सम्मेलन राखेको हो ।
एनआरएनए यूके अध्यक्ष प्रेम गाहामगरले एकता महाधिवेशनबारे महत्वपूर्ण जानकारी दिइने जनाउंदै बेलायतस्थित नेपाली सञ्चारकर्मीहरुलाई प्रेस मिटमा उपस्थित हुन अनुरोध गरेका छन् ।
एनआरएनए यूकेले डा. भीम पुनको संयोजकत्वमा एक निर्वाचन समिति बनाइसकेको छ । समितिको सदस्य सचिव विश्वासदीप तिगेला र सदस्यहरुमा राजकुमार (आरके) त्रिपाठी र टेकबहादुर थापा छन् ।
सर्वोच्च अदालतको गत चैत्र २१ गतेको परमादेशअनुसार गैरआवासीय नेपाली संघ (एनआरएनए) को एकता महाधिवेशन गराउन गठित उच्चस्तरीय समितिको निर्देशन बमोजिम एनआरएनए यूकेले अल्डरसटमा महाधिवेशन गर्न लागेको हो ।
उक्त महाधिवेशनमा एनआरएनए पूर्वअध्यक्ष तथा उच्चस्तरीय समितिका अध्यक्ष डा. शेष घले प्रमुख अतिथी हुनेछन् ।
एनआरएनए यूकेले अहिले सदस्यतामा पनि जोड दिइरहेको छ । नयाँ सदस्यताका लागि २३ मार्च २०२५ सम्म समयसीमा तोकिएको छ । एकता महाधिवेशनमा सहभागी हुन सदस्यता अनिवार्य छ । निम्न लिंकमा गएर सदस्यता लिन सकिने एनआरएनएए यूकेले जनाएको छ । nrnauk.org/unity-convention
