धरान, २० पुस : आधुनिक धरानको स्थापना भएको एक सय २३ वर्ष पुगेको अवसरमा आजदेखि धरान उत्सव सुरु भएको छ । पुस २४ सम्म सञ्चालन हुने उत्सवको धरानकी ज्येष्ठ नागरिक एक सय तीन वर्षीया चन्द्रमाया कटुवालले पानसमा बत्ती बालेर उद्घाटन गर्नुभयो ।
धरान उपमहानगर पालिकाको आयोजनामा सुरु भएको उत्सवमा काठमाडौँ महानगरपालिकाका प्रमुख बालेन्द्र शाहले धरान कला र सांस्कृतिक विविधतामा अगाडि रहेको बताउनुभयो ।
धरान उपमहानगरका प्रमुख हर्कराज राईले काठमाडौँ महानगरमा वृक्षरोपण, खोलानाला संरक्षणजस्ता महत्त्वपूर्ण काम भइरहेको उल्लेख गर्दै यसले महानगरका भावी पुस्तालाई फाइदा पुग्ने विश्वास व्यक्त गर्नुभयो ।
नगरप्रमुख राईले सङ्घीय र प्रदेश सरकारले स्थानीय तहलाई विकास कार्यमा सहयोग पुर्याउनुपर्ने बताउनुभयो । उहाँले धरानको विकासमा निरन्तर नगरवासीको सहयोग पाउने आशा व्यक्त गर्नुभयो ।
धरानका उपप्रमुख आइन्द्रविक्रम बेघाले धरान सांस्कृतिक विविधता, धार्मिक विविधता भएको सहरका रुपमा रहेको र सँधै सबै मिलेर, एकअर्कालाई सम्मान गरेर बस्ने बताउनुभयो ।
उत्सवमा किरात याक्थुम चुम्लुङ सुनसरीका अध्यक्ष सुवासचन्द्र हुक्पाचोङ्वाङ लगायतले शुभकामना व्यक्त गर्नुभयो । उत्सवको अवसरमा वरिष्ठ गायक दीप श्रेष्ठसहित एक दर्जनभन्दा बढीलाई सम्मान गरिएको थियो । उत्सवको अवसरमा विभिन्न सङ्घ संस्थाले झाँकीसहित बजार परिक्रमा गरेका छन् ।
