चाैथाे इलाम साहित्य महाेत्सव चैत एक गते सुरु

८ मार्च, इलाम । ‘पर्यटनका लागि साहित्य’ नारासहित चैत १ र २ गते इलाममा ‘चौथो इलाम साहित्य महोत्सव’ हुने भएको छ ।

महोत्सवमा नेपाल, भारत र बंगलादेशका ख्यातिप्राप्त लेखक, चिन्तक, कवि, कलाकार तथा राजनीतिज्ञ सहभागी हुने इलाम नगर साहित्य कला संस्कृति प्रतिष्ठानका अध्यक्ष प्रकाश थाम्सुहाङले बताए । ‘महोत्सवमा कला-सहित्यसँगै राजनीति र समाजका विविध आयाममा बहस हुनेछन्,’ उनले भने, ‘करिब डेढ दर्जन विभिन्न सत्रमा बहस सञ्चालन हुनेछ भने कविता र गजल साँझका कार्यक्रम पनि समावेश गरेका छौं ।’

भारतको जवाहरलाल नेहरु विश्वविद्यालयका पूर्वप्राध्यापक आनन्द कुमारले पर्यावरण र लोकतन्त्रका विषयमा कि नोट प्रस्तुत गर्नेछन् । पहिलो दिन गाउँको सौन्दर्यमा हाङयुग अज्ञात, कला र अध्यात्ममा टीकाराम यात्री, आनी छोइङ डोल्मा र मीन भामबीच बहस हुनेछ । यस्तै, विभेदविरुद्धका आलापमा पत्रकार दीपक सापकोटाले गायक प्रकाश सपुतसँग बहस चलाउनेछन् । कविताको पहिचान सत्रमा श्रवण मुकारुङ, मिश्र वैजयन्ती र अभय श्रेष्ठसँग पत्रकार फणीन्द्र संगमले संवाद गर्नेछन् ।

मुन्धुम र पर्यावरण विषयमा अर्जुनबाबु माबोहाङ, मोहनसिंह थेबे र सन्ध्या सुब्बा सिङ्गेजाङ्गोसँग प्रदीप मेन्याङ्बोले बहस सञ्चालन गर्नेछन् । सामाजिक सञ्जाल र मूल्य संकट शीर्षकमा पत्रकार रमन पौडेलले सञ्चारमन्त्री पृथ्वीसुब्बा गुरुङसँग संवाद गर्नेछन् । यस्तै, पर्यापर्यटन अबको बाटोमाथि छविलाल खतिवडा, विष्णु काफ्ले र प्रवीण खालिङसँग पत्रकार गिरिराज बाँस्कोटोको संवाद रहनेछ ।