१७ अक्टोबर, भेडेटार । आफ्ना तीन पहिचानवादी कार्यकर्ताहरू पक्राउ परेको विराेधमा प्रदेश नम्बर एक पुनः नामाङ्कन संयुक्त संघर्ष समितिले गरेको धनकुटाकाे नाका बन्द फिर्ता लिएको छ । तीन कार्यकर्ताहरू मनकुमार याम्फू, बुलन चेम्जोङ लिम्बू र सानु लिम्बुलाई बिनाधराैटी रिहाई गर्न प्रशासन सहमत भएपछि बन्द फिर्ता भएको हाे ।
धनकुटाका तीन कार्यकर्ताहरूलाई बिना शर्त रिहाइ नगरेसम्म सङ्घर्ष समितिले धनकुटा बन्दको आव्हान गरेको थियोे । उनीहरू पाँच दिनदेखि धनकुटा जिल्ला प्रहरी कार्यालयको हिरासतमा थिए । उनीहरूलाई गत भदाैमा धनकुटाको चौबिसेमा एमालेको भातृ सङ्गठन युवा सङ्घको कार्यक्रम अवरोध गरेको आरोपमा प्रहरीले पक्राउ गरेको हो ।
जिल्ला बन्दका क्रममा रिहाई नगर्दा हजारौं यात्रुले सास्ती पाएका थिए । धरानबाट उत्तरतर्फ संखुवासभा, भोजपुर, तेह्रथुम, ताप्लेजुङ जाने सम्पूर्ण सवारी भेडेटारमा रोकिएको थियोे । प्रदेश एक पुन नामाङ्कन संयुक्त संघर्ष समितिले बिना अभियोग अदालतको आदेशबिना पक्राउ गरेको भन्दै नागरिकको स्वतन्त्र जिउने अधिकार अनि विरोध गर्न पाउने अधिकारविरुद्ध रहेको आरोप लगाएको थियोे ।
असोज २९ गतेको समय भित्र बिनाशर्त रिहाईको माग गर्दा २९ गते धरौटीमा छाड्ने अडान लिएपछि आन्दोलनरत पक्षले पर्व योजना अनुसार बन्द आह्वान गरेको पहिचानका लागि युवा सुनसरी सचिव सागर सरगम चेम्जोङले बताए ।
बन्दका क्रममा प्रहरीले जबर्जस्ती बल प्रयोग गरेर खोल्न खोजेपछि स्थिति तनावपूर्ण भएको थियोे । साे क्रममा प्रहरी र आन्दोलनकारीहरू बीच घम्साघम्सी समेत भएको थियोे ।
