काठमाडौं । संगीतकार तथा संगीत प्रशिक्षक जिबेश चाम्लिङ राईको निधन भएको छ। गायिकाद्वय मेलिना राई र जुनु राईका बुवा जिबेशको काठमाडौंको धुम्बाराहीस्थित ह्याम्स अस्पतालमा उपचारका क्रममा गत ७ सेप्टेम्बर २०२६ का राति निधन भएको हो। पारिवारिक स्रोतलाई उद्धृत गर्दै प्रकाशित समाचारअनुसार उनी ब्रेन ट्युमरको उपचारमा थिए।
संगीतकार वसन्त सापकोटाले सामाजिक सञ्जालमार्फत उनको निधनको खबर सार्वजनिक गर्दै दुःख व्यक्त गरेका छन्। उनले मेलिना, जुनुलगायत शोकसन्तप्त परिवारप्रति समवेदना प्रकट गर्दै धैर्यधारण गर्ने शक्ति मिलोस् भन्ने कामना गरेका छन्।
मोरङको मिक्लाजुङ गाउँपालिकास्थित रमिते जन्मथलो भएका जिबेश संगीत सिर्जनासँगै शिक्षणमा सक्रिय थिए। संगीतकार शान्तिराम राईका अनुसार उनले काठमाडौंका १२ वटा विद्यालयमा संगीत शिक्षकका रूपमा काम गरेका थिए। बालबालिकालाई गायन सिकाउन जीवनको लामो समय खर्चिएका उनले थुप्रै बालगीतमा संगीतसमेत भरेका थिए।
छोरीहरू मेलिना र जुनुको सांगीतिक यात्रामा पनि उनको महत्त्वपूर्ण भूमिका थियो। बुवाको संगीत साधनाबाट प्रेरित दुवै छोरी गायनमा अघि बढेका हुन्। सहकर्मी शान्तिरामले उनलाई संगीतको गहिरो ज्ञान भएका मिलनसार स्रष्टाका रूपमा सम्झिएका छन्।
नागरिकमा प्रकाशित समाचारअनुसार जिबेशको अन्त्येष्टि असोज १६ गते शुक्रबार जन्मथलो मोरङमा धार्मिक परम्पराअनुसार गरिएको छ।
यसैबीच, पितृशोकका कारण मेलिना सहभागी हुने तय भएको बेलायतको ‘सुम्निमा सांगीतिक साँझ २०२६’ पनि स्थगित गरिएको छ। एचकेनेपालले आयोजकको विज्ञप्ति उद्धृत गर्दै जनाएअनुसार अक्टोबर ९ मा अल्डरशटस्थित एम्पायर हलमा आयोजना गर्ने भनिएको कार्यक्रम केही समयका लागि स्थगन गरिएको हो। आयोजकले दिवंगत संगीतकर्मीप्रति श्रद्धाञ्जली तथा परिवारप्रति समवेदना व्यक्त गरेको छ।
