काठमाडौं । गैरआवासीय नेपाली संघ (एनआरएनए) मलेसियाको नवौं महाधिवेशनमा सहभागी हुन पूर्व अर्थमन्त्री तथा नेपाली कांग्रेस प्रवक्ता डा. प्रकाशशरण महत र एनआरएनए अन्तर्राष्ट्रिय समन्वय परिषद्का अध्यक्ष महेश श्रेष्ठ मलेसिया पुगेका छन्। क्वालालम्पुरमा आइतबार हुने यस महाधिवेशनको तयारी तीव्र रूपमा भइरहेको छ।
यस कार्यक्रममा गैरआवासीय नेपालीहरूको हकहित, प्रवासी मजदुरका चुनौतीहरू, र नेपालको आर्थिक–सामाजिक विकासमा उनीहरूको योगदानजस्ता महत्त्वपूर्ण विषयमा छलफल हुनेछ। महाधिवेशनले नयाँ कार्यसमिति पनि चयन गर्नेछ। आयोजकहरूका अनुसार, यसले नेपाल–मलेसिया सम्बन्धलाई सुदृढ बनाउन र नेपाली संस्कृतिलाई अन्तर्राष्ट्रिय स्तरमा चिनाउन पनि सहयोग पुर्याउनेछ।
महाधिवेशनको अवसरमा तीज विशेष सांस्कृतिक कार्यक्रम पनि आयोजना गरिएको छ। यसमा नेपालबाट गएका कलाकार शोभा त्रिपाठी र बुद्ध लामाका साथै मलेसियामा रहेका नेपाली कलाकारहरूको प्रस्तुति रहनेछ। कार्यक्रममा प्रवासी नेपाली समाजमा उल्लेखनीय योगदान पुर्याउने व्यक्तिहरूलाई सम्मान गर्ने कार्यक्रम पनि तय भएको छ।
डा. प्रकाशशरण महत र महेश श्रेष्ठलाई मलेसियाको अन्तर्राष्ट्रिय विमानस्थल केएलआईमा भव्य स्वागत गरिएको थियो। उक्त स्वागत कार्यक्रममा नेपाली राजदूतावास, नेपाली जनसम्पर्क समिति मलेसिया, एनआरएनए आईसीसी, प्रवासी नेपाली मञ्च मलेसियालगायत विभिन्न संघसंस्थाका प्रतिनिधिहरूको उपस्थिति थियो।
कार्यक्रम ३१ अगस्ट २०२५, आइतबारका दिन मलेसियाको होटेल ग्रान्ड कन्टिनेन्टल क्वालालम्पुरमा स्थानीय समयअनुसार दिउँसो २ बजेदेखि बेलुका ९ बजेसम्म चल्नेछ।
