बिर्तामोड, झापा। नेपाल जनमुक्ति पार्टीको सातौँ राष्ट्रिय महाधिवेशन आगामी भदौ २७, २८ र २९ गते पूर्वी नेपालको झापा, बिर्तामोडमा आयोजना हुने भएको छ।
‘बहुजातीय लोकतान्त्रिक समाजवाद र समृद्ध नेपालको निर्माण हाम्रो प्रतिबद्धता’ भन्ने मूल नारासहित आयोजना हुन लागेको तीनदिने महाधिवेशनलाई पार्टीले आफ्नो राजनीतिक तथा सांगठनिक यात्राको महत्त्वपूर्ण अवसरका रूपमा प्रस्तुत गरेको छ। पार्टीको प्रचार सामग्रीमा ‘एकता, संघर्ष र परिवर्तन—समृद्ध नेपाल निर्माण हाम्रो अभियान’ भन्ने सन्देशसमेत समेटिएको छ।
पार्टीका केन्द्रीय अध्यक्ष केपी पालुङ्वाले महाधिवेशन सफल बनाउन पार्टीका नेता, कार्यकर्ता, समर्थक तथा शुभेच्छुकहरूलाई सक्रिय सहभागिता र सहयोगका लागि आग्रह गर्नुभएको छ। उहाँले पार्टीको भावी राजनीतिक कार्यदिशा, संगठन सुदृढीकरण र देशव्यापी विस्तारका दृष्टिले सातौँ राष्ट्रिय महाधिवेशन महत्त्वपूर्ण हुने बताउनुभएको छ।
नेपाल जनमुक्ति पार्टीले बहुजातीय समाजको वास्तविकता स्वीकार गर्दै राज्यका सबै तहमा समानुपातिक प्रतिनिधित्व, पहिचानमा आधारित संघीयता, स्वायत्तता, स्वशासन, धर्मनिरपेक्षता तथा भाषिक–सांस्कृतिक समानतालाई प्रमुख राजनीतिक मुद्दाका रूपमा उठाउँदै आएको छ। पार्टीको सार्वजनिक नीतिमा आदिवासी जनजाति, दलित, मधेसी, मुस्लिम, महिला तथा पछाडि पारिएका समुदायलाई राज्यको नीति निर्माण तहमा समानुपातिक रूपमा सहभागी गराउनुपर्ने उल्लेख छ।
नेपाल जनमुक्ति पार्टीको वर्तमान स्वरूप विभिन्न पहिचानवादी राजनीतिक शक्तिबीच भएको एकतापछि निर्माण भएको हो। राष्ट्रिय जनमुक्ति पार्टी, संघीय लिम्बुवान पार्टी नेपाल र लिम्बुवान राष्ट्रिय समितिबीच भएको सहमतिलाई विसं २०८१ वैशाखमा सम्पन्न विधान महाधिवेशनले अनुमोदन गरेपछि पार्टीको नाम संशोधन गरी ‘नेपाल जनमुक्ति पार्टी’ राखिएको हो ।
एकतापछिको संरचनामा एमएस थापा संरक्षक, रामबहादुर तुम्बाहाम्फे संस्थापक सदस्य, डीके बुद्धिस्ट वरिष्ठ नेता, केपी पालुङ्वा अध्यक्ष र केशव सूर्यवंशी कार्यकारी अध्यक्ष रहेको जानकारी यसअघि पार्टीले दिएको थियो। पार्टीले पूर्ण समानुपातिक निर्वाचन प्रणाली, पहिचानमा आधारित स्वायत्तता र स्वशासनसहितको बहुल राष्ट्रिय राज्य निर्माणका लागि संविधान संशोधन तथा पुनर्लेखन आवश्यक रहेको धारणा राख्दै आएको छ।
यसअघि विसं २०७८ मा सुनसरीको धरानमा सम्पन्न छैटौँ राष्ट्रिय महाधिवेशनले केपी पालुङ्वालाई अध्यक्ष र केशव सूर्यवंशीलाई कार्यकारी अध्यक्ष चयन गरेको थियो। उक्त महाधिवेशनले नयाँ केन्द्रीय नेतृत्वसमेत चयन गरेको थियो।
बिर्तामोडमा हुने सातौँ राष्ट्रिय महाधिवेशनले पार्टीको राजनीतिक कार्यदिशा, संगठनात्मक संरचना र भावी नेतृत्वका विषयमा निर्णय गर्ने अपेक्षा गरिएको छ।
