काठमाडौ, चैत २२ गते । जनता समाजवादी पार्टीका सङ्घीय परिषद् अध्यक्ष एवं पुर्वमन्त्री राजेन्द्र प्रसाद श्रेष्ठले ‘राजा र जनताको बिचको सङ्घर्षमा अन्ततः जनताको जित हुन्छ’ भन्ने अभिव्यक्ति दिएका छन् । पार्टीको बागमती प्रदेश समितिद्वारा शुक्रबार खुसिबुँस्थित नेपाः ब्यान्क्वेटमा ‘पुर्नउत्थानवादी गतिविधिहरूको विरोध गरौं, सङ्घीय लोकतान्त्रिक गणतन्त्रको रक्षा गरौं’ भन्ने नाराका साथ वर्तमान राजनीतिक परिस्थितिका सन्दर्भमा पार्टीको धारणा राख्दै प्रमुख अतिथि श्रेष्ठले सो कुरा बताएका हुन् ।
नेपालको इतिहासमा पनि राजा र जनताको सङ्घर्ष पटक–पटक देखिएको छ । २००७ सालदेखि २०६२/६३ सालको जनक्रान्तिसम्मको इतिहास हेर्दा पनि जनताले राजतन्त्रलाई परास्त गर्दै लोकतान्त्रिक प्रणाली स्थापना भएको र पछिल्लो जनक्रान्तिले सङ्घीय लोकतान्त्रिक गणतन्त्र स्थापना गरेको कुरा स्मरण गर्दै उनले अहिले केही प्रतिगामी र पुनर्उत्थानवादी शक्तिहरूले नेपालमा पुनः राजतन्त्रको पुनस्र्थापनाको लागि भन्दै अवाञ्छित गतिविधि गर्न थालेको बताए ।
पुनर्उत्थानवादीहरूको प्रयत्न सफल नहुने बताउँदै अध्यक्ष श्रेष्ठले भने, ‘बगेको खोला फर्किंदैन, देशमा राजतन्त्र पनि फर्किंदैन । नेपालमा गणतन्त्र संस्थागत भइसकेको छ ।’ उनले संसारको अनुभवले जनता नै निर्णायक शक्ति भएको कुरा देखाएको बताए । नेपालले २०६२/६३ सालको जनक्रान्तिपछि राजतन्त्र अन्त्य गरी सङ्घीय लोकतान्त्रिक गणतन्त्रको यात्रा तय गरिसकेको छ । अब यसलाई विकसित गर्दै सङ्घीय समाजवादी गणतन्त्रको गन्तव्यतर्फ जानुपर्ने कुरा उनले बताए ।
कार्यक्रमका प्रमुख अतिथि समेत रहेका अध्यक्ष श्रेष्ठले, देशमा पछिल्लो समय बढ्दै गएको पुनर्उत्थानवादी प्रवृत्तिप्रति चिन्ता व्यक्त गर्दै सङ्घीय लोकतान्त्रिक गणतन्त्रको रक्षा र सुदृढ गर्न सङ्घीयता, गणतन्त्र र धर्मनिरपेक्षता पक्षधर सम्पूर्ण शक्तिहरू एकजुट हुनुपर्नेमा जोड दिए । चैत १५ गते तिनकुनेमा राजावादीहरूको प्रदर्शन अमानवीय, अमर्यादित र उच्छृंखल भएको बताउँदै पत्रकार सुरेश रजक र सविन महर्जनको हत्या रहस्यमय र विवादास्पद रहेकाले छानबीन गर्नुपर्ने माग गरे । यस्ता विरोध प्रदर्शनहरूलाई कस्तो रूपमा हेर्ने भन्नेमा फरक मत हुन सक्छ, तर वैचारिक स्वतन्त्रता र लोकतान्त्रिक प्रणाली भएको मुलुकमा हिंसा, अराजकता र अमानवीय क्रियाकलाप कुनै पनि हालतमा स्वीकार्य नहुने उनले बताए ।
श्रेष्ठले काङ्ग्रेस र एमालेबिच भएको ७ बुँदे सहमतिमा संविधान संशोधनको बेमौसमी बाजा बजाएको बताउँदै त्यसले प्रतिगामी तत्वहरूलाई उत्साहित बनाएको र देशलाई अस्थिरतातर्फ दोह¥याएको बताए । उनले समानुपातिक प्रणालीले अस्थिरता निम्त्याएकाले प्रत्यक्ष निर्वाचनको निर्वाचन प्रणाली अपनाउनु पर्छ भन्नु टाउको दुख्दा नाइटोमा औषधी लाउनु जस्तै भएको बताए । उनले कांग्रेस र एमालेको काटाक्ष गर्दै अस्थिरताको जननी बहुमत जोगाउन नसक्ने र पटक पटक संसद भंग गरी मध्यावधी घोषणा गर्ने गिरिजा प्रसाद कोइराला र के.पी.ओली नै भएको बताए । उनले भने, ‘समस्या निर्वाचन प्रणालीमा होइन, पुराना पार्टीहरूको मानसिकतामा रहेको’ छ ।
प्रमुख अतिथि श्रेष्ठले देशमा राजनीतिक स्थिरताका लागि प्रत्यक्ष निर्वाचित राष्ट्रपती प्रणाली, पूर्ण समानुपातिक निर्वाचन प्रणाली र विज्ञहरूको मन्त्रिमण्डलको अवधारणालाई लागु गर्न समेत जोड दिए । सङ्घीयताविद्को रुपमा समेत चर्चित श्रेष्ठले नेपालमा सङ्घीय लोकतान्त्रिक गणतन्त्र संविधानतः स्थापित भए पनि पहिचानसहितको सङ्घीयता स्थापित हुन नसकेकाले सङ्घीयताकोे सहि कार्यान्वयन नभएको बताए । उनले नेपालमा अमेरिका र भारतमा भन्दा बढी सरकार बनाई सङ्घीयतालाई खर्चिलो बनाउने काम एकात्मकतावादी मानसिकता भएका पुराना पार्टीहरूले गरेको भन्दै उनीहरूले सङ्घीयतालाई खर्चिलो बनाई असफल पार्ने षदयन्त्र गरेको बताए । उनले नेपालमा आफ्नो पाार्टीले ११ वटा मात्र सरकार बनाई मितव्ययीता अपनाउने कुरा गरे पनि काङ्ग्रेस र एमाले मिलेर ७६१ सरकार (१ सङ्घीय, ७ प्रदेश, ७५३ स्थानीय) को संरचना बनाएको आरोप लगाए ।
सङ्घीय लोकतान्त्रिक गणतन्त्रलाई सुदृढ बनाउन नेपालमा सुशासन, विकास र समृद्धि रहेको उहाको धारणा रहेको थियो । उनले नेपालमा केन्द्रदेखि स्थानीय तहसम्म भइरहेको भ्रष्टाचार, कमिशनतन्त्र र राजनीतिक हस्तक्षेपले सङ्घीयताप्रति निराशा बढाएको र विभिन्न काण्डहरूले असन्तोष जन्माएको समेत बताए ।
कार्यक्रमलाई सम्बोधन गर्दै पार्टीका सहअध्यक्ष एवं पुर्वमन्त्री रेणु यादवले, देशको भविष्यबारे प्रश्न उठाउँदै लोकतान्त्रिक प्रक्रियालाई नै सबैभन्दा सुन्दर व्यवस्था भएको बताएकी छन् । नेपालको इतिहास हेर्दा जनताले विभिन्न आन्दोलनमार्फत व्यवस्था परिवर्तन गर्दै आएका छन् । चाहे त्यो राणा शासनको अन्त्य होस, पञ्चायत हटाएर बहुदलीय व्यवस्था ल्याउनु होस वा गणतन्त्र स्थापनाका लागि भएको सङ्घर्ष होस, यी सबै आन्दोलनहरूमा कैयौँ नागरिकले आफ्नो जीवन उत्सर्ग गरेका छन्, जसको सम्मान गर्न वर्तमान नेतृत्वले जनताको अपेक्षाअनुसार काम गर्न आवश्यक भएको उनले बताइन् । अबको प्रश्न भनेकै कुन शासन प्रणालीले देशलाई समृद्ध बनाउँछ ?
सहअध्यक्ष यादवले लोकतान्त्रिक प्रक्रिया नै सर्वोत्तम व्यवस्था भएको बताउँदै यस्तो व्यवस्थामा देशको नीति निर्माणदेखि सरकार सञ्चालनसम्म जनताको सहभागिता भएको हुन्छ भन्ने कुरा प्रस्टाइन ।
सो अवसरमा पार्टीका केन्द्रीय अनुशासन आयोगका अध्यक्ष कृष्ण बहादुर घःजु, राजनीतिक समितिका सदस्य तथा समाजवादी खस सङ्घका इन्चार्ज प्रेम नारायण थापा, बागमती प्रदेशका इन्चार्ज तथा राजनीतिक समिति सदस्य लाल बहादुर तामाङसङ्घीइता, गणतन्त्र, धर्मनिरपेक्षता, समानुपातिक प्रतिनिधित्व प्रणालीको रक्षा गर्नुपर्ने बतााउँदै पुनर्उत्थानवादी शक्तिहरूलाई परास्त गर्न जनस्तरबाट सचेतना अभियान चलाउन आवश्यक रहेको औंल्याए ।
जसपा बागमती प्रदेश अध्यक्ष जय गोलेको अध्यक्षतामा भएको उक्त भेलामा बागमती प्रदेशका सहइन्चार्ज द्वय न्हुच्छेलाल महजैन र पञ्चलाल महर्जन, समाजवादी किसान महासङ्घका केन्द्रीय अध्यक्ष भाग्य नारायण राय, केन्द्रीय सदस्यहरू योगराज वनेम, सुशीला शाक्य, नानु थामि र विमला आचार्य पुतवार, पार्टीका केन्द्रीय सल्लाहकार शेषनारायण महर्जन, विज्ञ परिषदका सदस्य द्वय खगेन्द्र बहादुर जोशी र भगवान दाश मानन्धर, मधेस प्रदेश अध्यक्ष अशोक यादव, भूमि आयोग पर्साका अध्यक्ष तबरेज अहमद लगायत कार्यक्रममा विभिन्न तहका नेता तथा कार्यकर्ताहरूको उपस्थिति रहेको थियो । कार्यक्रमको सञ्चालन अर्जुन कुवरले गरेका थिए भने स्वागत मन्तव्य लक्ष्मी थापाले राखेकी थिइन् ।
